Antes de converterse nun encontro gastronómico recoñecido, esta historia comezou moito antes, nunha casa familiar do rural galego.

Na parroquia de Gonte, a familia Rial medrou ligada á terra, á horta e a unha cociña feita co que daba o campo e o mar próximo. Esa memoria culinaria, transmitida de xeración en xeración, acabaría tomando forma anos despois en Casa Barqueiro, o restaurante que abriu as súas portas no ano 2001 e que hoxe celebra 25 anos de historia.

Un cuarto de século no que a familia mantivo intacta unha maneira de entender a hospitalidade: cociña galega, produto de proximidade e unha fonda conexión co territorio do Camiño de Santiago cara a Fisterra.

Ese mesmo espírito sería o que, co paso do tempo, daría lugar a un encontro moi especial.

Co paso dos anos, a familia Rial de Casa Barqueiro comezou a recibir cociñeiros, amigos e profesionais da gastronomía que compartían unha mesma maneira de entender a cociña.

Daquelas reunións naceu Estrelas Solidarias no Camiño, unha iniciativa que converte por un día Negreira nun punto de encontro para a gastronomía, o territorio e o compromiso social.