Como novidade destacada este ano, unha das estacións gastronómicas foi comisariada por un Estrela Michelin.
O privilexio recaeu no equipo de Manuel Costiña, do restaurante Retiro da Costiña (2 Estrelas Michelin), quen cativou aos asistentes cun exquisito mousse de troita afumada sobre tartaleta de pasta fío e caviar Osetra de Ambrose & Paubet. Un bocado delicado que simbolizou á perfección a fusión entre vangarda culinaria e produto de proximidade, esencia que define a súa cociña.
A presenza de Manuel Costiña nesta cita foi especialmente emotiva para moitos dos que formamos parte de Estrelas Solidarias, pois non só é un referente da alta cociña galega, senón tamén un amigo querido e un profesional profundamente comprometido cos valores que este evento representa. A súa familia, sempre presente, é exemplo de paixón, traballo e hospitalidade. Levan anos inspirándonos co seu xeito de entender a gastronomía como unha forma de coidar e celebrar a vida.
Este encontro, que naceu como unha pequena reunión de amigos cociñeiros no ano 2014, consolidouse esta semana como un referente a nivel estatal. Grazas ao impulso incansable dos irmáns Rial dende Casa Barqueiro e ao apoio fiel de entidades públicas e privadas. Estrelas Solidarias é hoxe unha fusión única de alta cociña, territorio e solidariedade.
